Síðdegis teygði ég makindalega úr mér í heita pottinum, lygndi aftur augunum og lét daginn seytla út í klórmengað vatnið. Við hlið mér settust stutta stund tveir 11-12 ára guttar og spjölluðu saman. Það litla brot sem ég heyrði var einhvern veginn svona.
Hrokkinkollur: Hei, tölum um alla leiðinlegu strákana í bekknum.
Ljóski: Já, kúl. Eins og Gunni.
Hrokkinkollur: Nei, hann er bara gaur sem er til.
Þetta fannst mér merkilegt. Þarna voru þeir að ræða um bekkjarfélaga sem náði ekki einu sinni upp í þá stöðu að teljast með "leiðinlegu strákunum". Ég fann sárt til með Gunna og vona svo sannarlega að eftirmæli mín verði ekki:
Beta. Bara kona sem var til.
Engin ummæli:
Skrifa ummæli